點樣先可以慳水？天文台台長李本瀅竟然教大家食嘢要「少肉多菜」。上任冇耐，台長尋日第一次接受電台訪問，講嘅嘢當然離不開天氣。講開未來幾十年香港降雨量減少，佢叫大家改變生活模式節約用水，提出嘅慳水大法卻係改變飲食習慣，真係諗佢唔到。
台長話畀大家知淨係「用少啲水係唔夠嘅」，事關每一公斤菜需要用二千公升水嚟種植灌溉，我哋先有得食，而一公斤牛肉呢，就更加要花成一萬公升水先養得出嚟，因此食多啲菜，就等同用少啲水。
講起呢啲科學化數據，台長好似停唔到口，數白欖咁繼續拋啲數字出嚟，話一個人一日沖涼用一百公升水，一個月唔沖涼頂籠都係（慳）三千公升：「你一個月慳番嚟嘅水，都唔夠你一日食嘢所用嘅水！」
台長仲話一公斤棉都係要萬幾公升水做出嚟，叫大家買件衫都要「用多啲、洗多幾次，用完要捐畀人」，簡言之就係要環保啲。雖說台長如數家珍苦口婆心，不過數據係唔可以代表一切嘅。