政策局副局長同政治助理資歷參差不齊，食物及衞生局嘅政治助理陳智遠上任初期就因為一臉稚氣，畀外界質疑年紀太細，不過同屬一個局嘅副局長梁卓偉，就同人唔同命，事關佢打扮實在太穩重，除咗一班記者心水清，其實無咩人知佢實際歲數，難怪尋日佢喺一個場合無意中透露咗自己只有卅六歲嗰一刻，旁邊好多人都呆咗。
話說梁卓偉尋日出席香港盲人輔導會同執業眼科醫生會一齊舉辦嘅「青光眼No Way」活動，例牌上完台講完稿後，好畀面咁行吓義賣攤位，仲喺檢驗攤位順便坐低睇吓有冇青光眼。不過，由於儀器要攞埋歲數先可以驗出被檢驗者有冇青光眼，所以一向外表老成持重嘅梁卓偉，都要細細聲講出歲數，不過「卅六」兩個字一出口，現場好多人都「Ｏ晒嘴」好意外，可能梁卓偉點睇都唔止呢個數，幫佢將歲數資料打入部儀器嘅女仔，都呆咗一呆先至回過神來入資料。
講開又講，梁卓偉讀得醫科，做埋教授，仲要入官場做副局長，如果真係「四字頭」都好順理成章。如果唔係睇咗資料，知佢七三年出世，分分鐘連記者都呆埋一份！