以往運作鬆散嘅「五散人」，早前傾過會喺新一年加強合作，頭炮就係十八個事務委員會嘅分工。好似醫學界梁家騮之前投訴過其餘四人，冇喺佢最關心嘅醫療衞生問題上撐佢，保險界陳健波今年就報咗名加入衞生事務委員會，令梁家騮冇咁勢孤力弱。不過政治冇免費午餐，梁家騮去年只加入三個委員會，今年亦要加入五個撐番自己盟友。

工聯會講明要提高三名新丁議員知名度，最簡單就係要佢哋開多啲會，其中葉偉明同潘佩璆加入嘅委員會數目都有所增加，包括雙雙加入最多基層民生議題嘅福利事務委員會。知名度已經夠晒高嘅「老大哥」王國興，就退出福利事務委員會，轉戰民政同發展事務委員會。至於「老新丁」黃國健就會留守政制事務委員會，就年底嘅政改方案代表工聯會發聲。

議員數目由原來七名大幅減少到三名嘅自由黨，以及由自由黨分裂出嚟嘅經濟動力，都會喺新一年重新分工，令各成員嘅工作量同關注點更加平均。例如自由黨主席劉健儀就加入咗經濟發展事務委員會，等方剛唔使得一支公撐住咁幸苦。經濟動力梁劉柔芬就會退出林健鋒同梁君彥都有加入嘅工商事務委員會，轉戰民政委員會撐劉皇發。

葉劉撈最多瓣

一啲冇經歷大變化嘅政團，亦有就內部分工作出微調，例如專業會議嘅石禮謙同何鍾泰，前者就加多兩個委員會，後者就減番兩個，令兩人嘅委員會數目變番平均啲。去年只入咗五個委員會嘅民主黨張文光，畀個黨批評佢太懶，今年要報多兩個；去年一口氣入咗八個委員會嘅黃成智，個黨就反而想佢專注啲，唔好周身刀冇張利，今年報少咗兩個會。

獨立議員方面，去年已經入咗八個委員會嘅葉劉淑儀，今年再下一城入埋工商事務委員會，成為加入最多事務委員會嘅議員，除咗顯示佢勤力之外，亦證明議員喺立法會單打獨鬥好幸苦。「大懶蟲」金融界李國寶就繼續懶理外界批評，同發叔一樣只係入咗兩個委員會。