本文重點
佛家經常話「化戾氣為祥和」，究竟點樣先至化到戾氣，卓妮介紹個好方法畀大家。香港大會堂低座今日開始展出一個名為《祥和——中國智慧之光：文殊菩薩尊像珍藏展》，二百一十六件菩薩尊像首次曝光，講都唔信，原來全部都係首個發明中文無線Call機、冠軍科技集團主席簡文樂（Paul）嘅珍藏，珍貴到連國家宗教事務局副局長蔣堅永和年逾八旬嘅香港佛聯會副會長都畀面出席。
今次展覽主題稱為文殊菩薩，其實全名應為「文殊師利菩薩」，有「具覺悟本質的眾生」嘅意思，代表智慧嘅力量，係最古老嘅菩薩，經常被帝王供奉為護國神明，地位超然，卓妮欣賞一陣，已被一股靈氣所吸引，有洗滌心靈之效。科技與宗教好難扯上關係，有乜嘢推動阿Paul搞今次展覽呢？原來同去年發生嘅幾件關乎道德嘅大事有關。
斥現代人貪搵快錢
阿Paul話，道德係中國人嘅核心價值，但呢代人偏偏遺失咗呢種價值，一味貪快，漸漸道德敗壞，好似金融海嘯就係因為大家搵快錢所致。早前一連串食物安全事故阿Paul亦看在眼內，話目睹班無良商人為咗賺錢，罔顧公眾安全胡亂在食品添加化學物質，真係痛心疾首，思前想後，決定公開珍藏，希望觀賞者從文物中感受到中國五千年德行，從中潛移默化提升大眾德行。
阿Paul作為科技專才，為何心醉佛教藝術呢？阿Paul坦言，藝術同科技看來風馬牛不相及，但實際卻一脈相承，例如撰寫電腦程式，會當為一件藝術品，需要極度細心，一步一步來，錯一步都唔得，否則一定做得唔好，卓妮聽完都覺得好有道理。特別一提係，兩星期展覽結束後，阿Paul就會將所有展品捐贈畀由佢自己做主席嘅中華世界文化遺產保護基金。今次展覽非常珍貴，大家不妨去感受吓佛門嘅祥和同智慧喇！
卓妮