本報當時已警告過，呢個情況經常搞到險象環生，遲早會出意外，弊在領匯好似借咗聾耳陳隻耳咁，你有你講，佢有佢繼續闊佬懶理，結果話口未完就畀本報不幸言中嘞！

日前有個孝順女推住坐輪椅嘅阿媽行商場，被迫乘搭扶手電梯，卒之搞到兩母女連人帶輪椅碌落電梯。母親擦傷手腳，女兒仲大劑，跌到背脊傷痕纍纍，仲一度陷入半昏迷狀態添，真係收買人命。

對於今次意外，領匯絕對係責無旁貸，佢哋封時，應該要預計到有風險存在㗎啦，既然傳媒都睇到風險，而且仲提埋警告，但居然冇人理，你話奇唔奇吖？唉，查實佢哋邊係睇唔到風險呀，只不過係利欲熏心，根本唔當人命安全係一回事。

係，領匯在商言商，賺錢唔係話唔啱，之不過咁，領匯今年已經勁賺超過十八億元啦，使唔使咁唯利是圖，罔顧市民生命安全呀？

尋日有批德田邨居民去平機會投訴，質疑領匯長期封閉商場客，罔顧殘疾人士嘅需要。弊在領匯仲死撐話一直有同平機會及盲人協會商討合適嘅設施，又話相信今次意外只係個別事件。

查實今次事件凸顯嘅點只係個別問題，直情係領匯轄下所有設施嘅共同問題就真。領匯接手管理大部分公共屋邨商場以及停車場，本來係有責任照顧低下階層市民嘅需要，唔可以一句「商業決定」就任意妄為。可惜大家所見嘅係，領匯不斷瘋狂加租牟取暴利，唔只趕絕小商戶，而且剝奪公屋居民嘅權益，根本從來冇遵守過自己嘅承諾。

事實上，領匯接二連三爆出醜聞，爭拗無日無之，一早已經引起公憤。有公屋團體發起遊行抗議領匯無法無天，亦有醫生團體上街反對領匯瘋狂加租，總之，自從領匯接手公屋商場及停車場後，就搞到家嘈屋閉，永無寧日。

不過想領匯收手都幾難，佢哋連公屋商場嘅管理費都拖得就拖，仲被踢爆違反承諾，為咗減低管理支出，冇開放屋邨停車場天台嘅休憩設施，直至事件被踢爆後，港府先死死地氣向領匯發出警告信，可見領匯有幾惡啦！

講到底，好明顯就係政府失職，不監不管，對領匯為所欲為袖手旁觀。唔好話功夫茶唔提醒，再係咁縱容呢隻大怪獸繼續殺雞取卵，引起更大嘅公憤，最後所有衰嘢都入埋政府數，到時就自食苦果喇！