麒伯尋日出席電台宣傳東亞運活動，講起續任機會高唔高，麒伯答得巧妙，佢以右手指指天花板話：「要佢（上天）先知喎。」講完佢繼續「耍太極」話：「依家做好每一日先，我最驚自己做唔到，前面係點大家都唔知。」擺明係唔想講太多漏風聲。

麒伯唔想咁高調亦不難理解，皆因佢以六十五歲高齡空降做處長，曾經畀人笑佢係最老廣播處長，雖然麒伯老而彌堅，不過歲數大始終係話柄，所以麒伯尋日再三強調身體狀況唔錯，話每日堅持喺屋企附近行吓海堤邊四十分鐘，又定期檢查心臟，總之要保持最佳狀態。麒伯又語帶雙關話：「前面仲有好多路要行」，言下之意即係仲有大把世界等住佢，麒伯續任廣播處長，睇怕成數都幾高。

講到快將來臨嘅東亞運有乜搞作，康文署署長馮程淑儀話，下周將公布參賽選手名單，有乜體壇明星來港爭獎牌，大家拭目以待！