中華基督教青年會尋日搞咗個長者紙飛機比賽，身為安老事務委員會主席嘅「金刀梁」梁智鴻都有出席。不過，金刀梁最叻嘅並唔係摺飛機，而係摺紙船，佢仲有令紙船浮喺水面嘅「不沉絕招」。
金刀梁話，自己後生嗰陣都試過摺紙飛機，所以早前聽到有呢個比賽不知幾興奮，都有問吓可唔可以參加埋一份，點知遲咗一步，惟有等下一年喇！佢話摺飛機可以刺激腦筋，掟飛機又可以當做運動，仲可以同啲孫仔孫女研究吓點樣摺飛機，架飛機先可以飛得遠。問到佢有冇同自己啲孫仔孫女摺吓飛機，佢就話啲孫都七、八歲，冇同佢哋玩囉。
不過，金刀梁最叻嘅唔係摺飛機，而係摺紙船，仲即場傳授秘訣。佢話以前佢成日都摺紙船，為咗令到隻紙船唔好沉落水，佢就點着支蠟燭，將啲融咗嘅蠟滴落隻紙船度，咁樣隻紙船就唔會沉落水喇。佢個頭成日都咁立立令，風吹都唔亂，唔知係唔係搽咗啲秘製嘅髮蠟呢？