迪士尼樂園尋日邀請十幾位立法會議員及其家屬夜遊「迪士尼黑色世界」，體驗新鮮出爐嘅驚嚇遊樂項目，議員謝偉俊、黃定光、陳克勤、陳鑑林、馮檢基等紛紛變身「嘩鬼」玩到癲，受「求愛不遂」緋聞困擾嘅甘乃威就無心玩樂，報咗名都臨時缺席。
議員及家屬團合共約四十人尋晚六點鐘殺入迪士尼，喺迪士尼行政總裁金民豪親自領軍下，率先試玩為萬聖節而設嘅噱頭遊樂項目，包括「宇宙深寒」、「大街詭異酒店」、「森魔詭域」等。遊戲名聽落好驚慄，到底驚唔驚？
Paul謝話，畀大會安排嘅嘩鬼演員搞到出晒汗就真，不過唔係驚到出汗，而係焗到出汗，事關遊樂館內人頭湧湧。嘩鬼演員熱情搞氣氛，阿Paul笑稱，無畀嘩鬼性騷擾，好失望喎！
講起「性騷擾」，不期然令人諗起甘乃威，阿Paul篤爆話，甘威本來報咗名玩埋一份，唔知係咪怕呢排黑仔撞鬼，所以臨時失場。象哥黃定光就帶埋一對仔女合家歡，佢話遊戲嘅驚嚇度只屬「濕濕碎」，無咁易嚇親佢，不過一對子女就玩得勁High。