發叔今年初再上層樓加入行會，雖然惹來各方猜疑，但佢一於好少理，一上場就平息元朗錦綉大道路權紛爭，和氣收場，其後又在拆解正生書院遷校風波上，一招「拖」字訣，拖到正生爆出醜聞，令搬遷問題無限期押後。輪到近日廣深港高鐵興建涉及收地賠償，最棘手係游說石崗菜園村部分村民不遷不拆訴求，但尋日政府、鄉議局及村民三方會議後終漸露曙光。

當和事老 力陳利害

據聞運輸及房屋局局長鄭汝樺（Eva）為遷就發叔下午到立法會開財務委員會，尋日特別選擇在美利大廈大本營同菜園村村民開會，聽取村民賠償訴求，發叔就在場擔當和事老，力陳利害，叫村民明白政府要按程序做事，賠償不可偏離政策。正所謂「你識做時我識做」，Eva話會積極考慮村民訴求，發叔就即場大讚當局做得好，讚到Eva誇啦啦，村民隨即掌聲雷動，氣氛和諧過河蟹。

頻撲返港 犧牲小我

不過，有部分村民仍堅持「不遷不拆」，拒絕參加尋日會面，要求Eva再親身落菜園村走一趟。據聞Eva已決定在下周二（十三日）再落村，經過副局長邱誠武幾次明查暗訪落村做掃雷工作，加上發叔答應再出席做和事老，相信將Eva落村嘅風險減至最低。據聞今次Eva落村講明唔會再周圍參觀條村，只會坐低聽意見及闡明政府立場，就算村民企硬都無辦法。

其實發叔都算唔話得，下周一要到梅州為世界客家大會演講，發叔坦言作為客家人同聲同氣，所以非參加不可，惟有翌日趕返港去菜園村，要佢老人家頻頻撲撲，都咪話唔辛苦。不過，發叔曉以大義話，無論原居民或非原居民，都係新界一分子，鄉議局察覺到有唔公平，一定會出面向政府提出意見，仲話好有信心搞掂今次菜園村賠償問題，但提醒村民要考慮公眾利益，犧牲小我，完成大我，貫徹新界精神。