有人為藝術而犧牲，但民政事務局副局長許曉暉（Florence）當年就為屋企犧牲咗讀藝術，否則可能已經成為藝術家。卓妮早兩日黃昏時間在中環擺花街Pacific Coffee遇到Florence，見她一邊歎咖啡，一邊欣賞牆壁上一幅一幅嘅藝術畫作，講開才知道Florence好有藝術細胞，早前仲做中間人協助本港年輕藝術家，將啲藝術畫作品放喺呢間咖啡店部分分店展出及出售。
叫買油畫撐本地藝術
卓妮講過，Florence當年就讀張祝珊英文中學時，曾遇上一位優秀美術老師，教她繪畫、攝影及黑房曬相技術，令她培養出濃厚藝術興趣。咁點解Florence大學唔修讀藝術，反而選讀中大工商管理呢？Florence無奈話，以前屋企開廠，所以期望她讀商科幫到屋企盤生意。雖然係咁，Florence話一直保持啲藝術細胞，做咗民政局後仲多咗機會接觸藝術。
現時民政局有好多藝術大計，主力推動就有空置廠廈發展成藝墟，講開油畫，Florence大讚畫作有水準，呼籲大家睇啱嘅話，買幅支持吓本地藝術喎。卓妮睇過啲畫作，顏色鮮艷，價錢由幾千元至過萬元不等，貴唔貴真係見仁見智，正所謂千金難買心頭好嘛！
梁鳳儀捱飯盒食燒味
當日同啲副局長好有緣，遇見Florence之前，卓妮中午路過太子大廈Canteen，又見到財經事務及庫務局副局長梁鳳儀買飯盒，為乜要捱飯盒呢？梁鳳儀就話，每月總有兩至三日無安排商務午餐，可以得閒出街行吓，見到啲燒味好吸引，忍唔住買個叉鵝米拎走囉，但佢同卓妮講多兩講，決定改為堂食，一路食一路傾計。
梁鳳儀話，雖然日常工作好忙，但都有私人時間，事關大女早已到英國讀書，今年升讀大學，細仔今年又去埋英國讀高中，又顧少一瓣，多啲時間做自己嘢，所以平時除咗聽iPod外，同時睇緊三本書，包括《羅斯福自傳》及兩本財經書籍。啱嘅，無論公務如何繁忙，都應該輕鬆吓！
卓妮