06/10/2009

播放本新聞相關短片

政情：阿Paul寸港台顧委會似紙紮

立法會尋日傾香港電台問題，點知潮語滿天飛。旅遊界代表謝偉俊（Paul）明寸由特首委任嘅顧問委員會，比港府架巡遊花車更似「紙紮」，事關委員會無實權，無助於改善港台問題。之後有議員話雖然今次港台「升呢」，得到新資源同一份與政務司司長簽嘅約章，但港府嘅廣播政策仍然係「超低能」。商務及經濟發展局局長劉吳惠蘭嘅表情似明似唔明，其實佢不妨多用潮語回應，無咁官腔之餘，仲可以推動創意文化，真係一舉兩得！