唔係講笑，講起舞火龍呢項民間活動就真係歷史悠久，至今已經超過一百二十年，絕對係有本土特色嘅文化傳統項目。所以呢，連民政事務局都識貨，揀咗大坑舞火龍，再加上長洲太平清醮、大澳端午遊涌以及盂蘭勝會，申請列為國家級非物質文化遺產。民政事務局局長曾德成話喎，呢啲項目喺本地社區傳承百多年，極具代表性，而且獲得社會普遍認同。聽曾局長咁講，以為港府轉死性，開始關心保育非物質文化遺產添。

嘥氣啦，成班高官冇嘢叻，最叻就係吹水同埋做騷，一有彩攞就爭崩頭出嚟，但想佢哋做嘢就唔使旨意咯。唔講唔知，家陣舞火龍搞到有聲有色，吸引咗唔少外國旅客慕名而來，並唔係政府嘅功勞，最近三十幾年都係靠大坑坊眾福利會獨力承擔。

據舞火龍總指揮講，咁多年嚟都係佢哋一腳踢籌辦，都唔指望政府會幫到乜嘢，反正都係自己畀錢，自己落手落腳做，申唔申遺冇乜所謂。唉，成班懶官只係識得匿埋喺辦公室呻，又話香港少景點，又話香港冇旅遊資源，其實邊係冇吖，只不過係政府唔識寶啫，淨係識得吹水，大把文化遺產喺度都唔識保護，沉香當爛柴。

以香港國際龍舟邀請賽為例吖，本來搞得係威係勢㗎，唔只吸引好多外國隊伍嚟參賽，仲吸引唔少旅客嚟參觀添，弊在呢項活動一年不如一年，曾經搞到有參賽隊伍投訴設施唔掂，認真失禮。鬼咩，一項國際盛事，竟然靠龍舟協會頂硬上，幾年前，咪試過因為唔夠贊助經費幾乎搞唔成囉。

其實龍舟邀請賽經費都唔係多，一年大約幾百萬元左右。對於大花筒政府，呢個數字簡直係九牛一毛啦，請少一個半個副局長、政治助理，條數已經喺番度啦。但康文署只肯贊助雞碎咁多，旅遊發展局仲離譜，竟然話好多活動都要經費，冇辦法每個都贊助。

政府保育政策見一步行一步，一味葉公好龍，講多過做，再係咁落去，好多傳統文化容乜易後繼無人。好似話聯合國教科文組織啱啱審議同埋批准嘅《人類非物質文化遺產代表作名錄》，當中就包括傳統曲藝粵劇。

可惜吖，政府話就話支持粵劇文化，但從新光戲院租約事件就知道佢哋得把口，如果唔係粵劇界人士頻頻撲撲爭取，可能連一個咁重要嘅表演場地都冇埋，粵劇呢個文化遺產實聽變成「文化遺骸」都得。

計功夫茶話齋，有時呢啲文化遺產真係申唔申報都罷啦，好似話大澳端午遊涌咁吖，直情唔申好過申啦，你睇吓呢個一向有「東方威尼斯」之稱嘅大澳水鄉，次次有颱風或者連場大雨，幾乎都會變成一片汪洋。

遠嘅唔講，前排颱風「巨爵」襲港期間，海水倒灌又令到大澳變成澤國。最離譜嘅係，起條阻止海水倒灌嘅防波堤已經講咗幾年，仲要等到明年至動工，二○一一年先至有望完成，目前所謂防災工作，原來就係靠發警告避難。唉，仲話要活化大澳，發展成為香港重要旅遊景點添，唔好笑大人個口啦，到時沖走幾個旅客就大件事啦！