中華總商會尋日趁中秋前夕做善事，送出一萬盒約值六十萬元嘅月餅畀長者及低收入家庭，中總會長蔡冠深帶頭做「月餅先生」，喺深水埗一間社區中心大派月餅。蔡會長自爆連日來京港兩頭撲，為主持十‧一晚上嘅香港煙花匯演，留京睇閱兵嘅如意算盤都打爛埋。
蔡會長尋日下午聯同副會長張成雄、林銘森等人送贈愛心月餅畀七十名長者，講起上京參加建國六十周年慶典有乜體會，佢扁嘴話，無睇到閱兵就急急趕返香港喎。到底有乜急事？原來蔡會長上京後突然收到風，話閱兵儀式守衞森嚴，本來計劃一睇完閱兵就同一眾中總會董「撤退」，搭中午一點機返港，點知大會話唔敢保證派到專車送佢衝出重圍；即使趕到機場都唔擔保空中管制已解除，班機可以如期起飛。
咁講法真係大件事囉，事關蔡會長十‧一晚上要以主人家身份返港主持煙花匯演，進退兩難下，惟有忍痛放棄睇閱兵，單拖搭九月三十日嘅夜機返香港，啱啱夠時間食埋國宴，但錯失咗十年一度嘅閱兵儀式，蔡會長話好可惜，不過為咗萬無一失，寧願留港睇閱兵轉播，好過臨時甩轆喎。