03/10/2009

播放本新聞相關短片

政情:煲呔曾探完病露愁容

鬍鬚曾周日急性心臟病發入院,煲呔曾卻身在北京準備參加「十‧一」活動,所以尋日佢一返港就直接趕去醫院探其沙煲兄弟。呢幾日大家得到消息係鬍鬚曾康復進展良好,但煲呔曾去到醫院卻神色凝重,臉如死灰,乸口乸臉。

煲呔曾尋日在病房逗留約十五分鐘,離開時個樣想喊咁款,又用左手按住心口,口窒窒話:「好彩無嘢喇,心頭大石放得低。」點解煲呔曾把口講好消息,但臉容就要咁憂傷呢?唔通有啲嘢唔講得?

今次救番鬍鬚曾一命嘅瑪麗醫院心臟科主管李偉聯,忽然變成大紅人,李醫生尋日朝早巡完病房後等期間,又被大包圍,仲被記者追到入,李醫生表現得有點手足無措。

問到鬍鬚曾可否回家過中秋?李醫生竟然反問:「幾時係中秋節呀?」當他知道今日就係中秋節後,就話:「有機會!總之佢復原得相當好同快;如果司長依家行出來,會同你哋一樣,你唔知佢病緊,行得走得,仲自己沖涼,乜嘢都做到!」不過,鬍鬚曾仍要等候驗血報告,才可決定出院時間。

醫管局主席胡定旭尋日由北京返港,一落機都有去探鬍鬚曾。肥胡走後,東亞銀行主席李國寶亦去探望鬍鬚曾,見佢手持一個紙袋,露咗一個楊桃燈籠,逗留十分鐘便離開。問李國寶係咪送贈中秋賀禮畀鬍鬚曾應節,佢就話只係生果及日用品,之後匆匆離開。