胡恩威早兩年一度成為煲呔曾嘅「大紅人」，西九文化區諮詢小組、公共廣播服務檢討委員會、以至政府好似好重視嘅經濟機遇委員會，都搵咗佢做委員，但最近就陸續畀政府「搣柴」。有人估計係因為佢成日喺會內會外繼續鬧政府，不過佢本人就覺得政府根本由頭到尾只係想借佢過橋，一過完橋就立即抽番起塊板，最後搞到佢跌咗落水。

少4500萬勢掀裁員潮

胡恩威尋日接受網上電視台訪問時，自爆佢擔任行政總裁嘅藝團「進念二十面體」，來年度將會畀藝發局勁削三成資助，少咗成二百萬元經費，可能要炒六、七個職員先至圍到皮；其餘八個每年攞最多政府資助嘅旗艦藝團，亦分別被削資三至五成，每年合共少咗成四千五百萬元撥款，肯定會令本地藝術界爆發大規模嘅減薪裁員潮。

胡恩威炮轟，政府辯稱該筆喺○八至一○年度增加嘅資助額，純屬一次性撥款，冇話過年年都有，同佢當年嘅理解好唔同；即使真係佢理解錯咗，有關做法亦令人覺得政府當年增加資助，純粹係為咗爭取佢哋支持撥款成立西管局，到撥款通過後就立即將資助額打回原形。

胡恩威又話，西管局成立前，負責嘅民政局官員每年最少會同各個藝團開兩次會交流意見，依家就幾乎係零接觸，唔知純粹係新上場嗰一批官員偷懶唔做嘢、定係政府打完齋唔要和尚，利用完佢哋之後就面都費事見。

講起公共廣播服務，胡恩威就仲火滾，佢話檢討委員會報告嘅最重要建議，就係公共廣播應該獨立於政府，政府卻反過來將公共廣播判番畀身為政府部門嘅香港電台做，並聲稱已落實咗委員會絕大部分建議，直情係騎劫咗佢哋份報告，仲衰過單純過橋抽板。呢個故事教訓大家要帶眼識人，胡恩威下次唔好咁天真咁傻喇！