本文重點
建國六十周年慶典閱兵儀式後嘅花車巡遊，香港花車設計黯然失色，毫無主題及創意，更被彈似「紙紮」。一班人大政協及觀禮團成員尋日陸續回港，一落機就繼續發炮話香港花車唔掂，全國政協常委陳永棋鬧得最厲害，批評香港花車「十年都無進步過」，立法會議員黃容根更直斥花車主題反映高官無遠見，老調重彈。
有份觀禮嘅棋哥形容，香港花車好醜樣，唔得大體，睇唔到有擺放特別心思，同內地省市花車比較，香港品質放喺好後，十年前又係好曳，十年後又係咁曳，即係十年無進步過。究竟點醜樣法呢？棋哥都費事再講咁多，話總之就係唔順眼啦，相信大家都有呢個感覺啦！
國金模型似鬚刨
觀禮團成員黃容根都話，香港花車比起內地省市花車真係相形見絀，花車主題反映高官無遠見，只係將啲舊嘢堆砌在花車上，毫無創意，表達唔到香港未來發展。另一觀禮團成員黃定光都話香港花車單調，好淡色，車上嘅國金模型似鬚刨。
香港花車由政制及內地事務局統籌，用咗三百三十萬元公帑製作，外判予本港公司設計，然後到北京裝嵌。據講旅遊發展局新年識郁嘅牛形公仔巡遊花車都係用咗五十萬，點解今次香港花車要成三百幾萬呢？但港府死撐話，靚唔靚只係各花入各眼，要尊重唔同人嘅品味喎。
卓妮