本文重點
特區高層被病魔糾纏，呢頭財爺曾俊華突然要入院做心臟手術，係咪可以出院過中秋都未知，嗰頭政務司司長唐英年喺天安門睇閱兵，竟然唔襟捱曬到不適，因而連煙花晚會都無法出席。消息話，前晚至少有三名全國政協常委一樣缺席晚會，包括唐唐嘅好友「肥龍」許仕仁，所以有傳佢哋兩個一齊外出撐枱腳。不過，唐唐新聞秘書就話，唐唐成晚喺酒店，無出過去。
唐唐不適返港封嘴
一連幾日嘅北京「十‧一」活動結束，香港政商名人尋日陸續返港，喺天安門城樓曬親、聲稱因皮膚敏感不適嘅唐唐，步出機場閘口，只見佢滿面通紅。不過，對有關睇閱兵儀式曬到不適嘅問題，一律封口唔答。
一場建國六十周年慶典閱兵儀式，令城中「紅」人更加「紅」，京城人工造美消雲減雨，港區人大、政協同港府觀禮團成員，前日雲集天安門，喺烈日當空下睇閱兵，變相乾曬幾粒鐘，唔少都曬到紅卜卜，好似漁農界黃容根、行政會議成員張炳良、經濟動力立法會議員林健鋒、保安局局長李少光同香港青年聯會常務副主席葉振都，今次真係由京城「紅」到返香港。黃容根話，屋企人一早提咗佢要搽防曬，不過佢怕塊面黐立立，仲多過怕曬黑，所以話之佢。
上京嘅政界巾幗就無黃容根咁瀟灑嘞，運輸及房屋局局長鄭汝樺、匯賢智庫葉劉淑儀同經濟動力梁劉柔芬（Sophie）都做足防曬措施。葉太話，十年前閱兵曬到暈，今次有備而來，帶定帽擋太陽。Sophie仲勁，三招「保白」，搽防曬膏、戴專業防曬帽，仲要搵港區人大馬豪輝遮蔭，無錯，馬豪輝夠大份，Sophie匿喺佢後面，連手腳都遮埋，防曬一絕！唔怪得有人話，馬豪輝曬到成隻龍蝦咁啦！
卓妮