買舊燒肉斤両完全唔對辦，畀燒臘檔呃咗一大橛，簡直離晒大譜。海關今年頭三季透過放蛇，揭發有九間燒臘檔涉嫌呃秤，檢控咗其中五間，灣仔一間開咗幾十年嘅老字號，賣燒肉收錢計嘅重量比實際重量多咗近四成。涉及呃秤嘅燒臘檔遍布港九新界，市民去到邊都有可能「中招」，問你驚未？

更得人驚嘅係，舊年被海關成功檢控嘅同類個案只有一宗，今年數字翻咗好幾番，睇怕唔係因為當局加強咗打擊力度，而係呃秤嘅現象遍地開花。呢嗱，數字一公布，尋日就有唔少市民投訴各式各樣嘅呃秤手法，除咗買燒肉，連買幾條節瓜、買斤蜜棗，都試過畀人呃秤。但係投訴還投訴，有關部門睬你都嘥氣。

講真，家陣幾乎買乜都有機會領嘢，市民聽得最多嘅，就係買海鮮畀人呃嘞。一隻唔到六両嘅蟹，一秤足足重咗成倍，變咗十二両；買隻蟹兩斤重，綁蟹嘅水草居然有成斤，正一妹仔大過主人婆。

食落肚嘅係咁，屋企用嘅一樣呃得咁離譜。消委會早排發現，聲稱又慳電又光猛嘅慳電膽，部分型號不但唔夠光，而且愈用愈暗，壽命遠低於廠家自己宣傳嘅數據。佢哋測試咗十五款一匹半冷氣機，其中十四款實際製冷量比聲稱嘅要低，有啲甚至少咗接近百分之六點五，真係乜都可以呃。

最搞笑嘅係，連接待訪港旅客嘅賓館都一樣有「水貨版」。尖沙咀有啲賓館畀不法商人冒名頂替搶客，呢啲可能屬無牌經營嘅「影子賓館」愈開愈多，但政府監管唔到位，幾個月前就有懷疑影子賓館發生三級大火，釀成一死八傷慘劇。香港仲話係「旅遊之都」，乜架都丟晒啦。

至弊港府眼白白睇住旅遊業聲譽受損都無動於衷，一直冇積極打擊欺詐行為，就算發現問題，都冇積極跟進處理，無良商戶根本當政府冇到，舖照開，錢照呃，客照劏。

前年「五一黃金周」前，央視派記者放蛇，將本港黑店嘅劏客手法公諸於眾，「購物天堂」畀人拆埋招牌。港府為咗補鑊，賊過興兵大舉掃蕩，但有頭威冇尾陣，冇幾耐就放軟晒手腳，乜都唔做，啲無良黑店咪重施故技，呃得就呃囉。

今年頭八個月訪港旅客比舊年同期少咗百分之三點四，話就話受金融海嘯同豬流感影響啫，如果當局繼續翹埋雙手，任由呃秤呢一類商業欺詐行為氾濫，人哋聽到香港都怕怕啦，唔通貼錢買難受，過嚟做羊牯畀人劏咩。