政府尋日搞咗個公務員優質服務獎勵計劃，唐英年任頒獎嘉賓，順便致辭講吓點樣先係一個優秀公務員。唐唐話，凡事要從市民角度諗吓，需要時要行多一步，尤其當涉及跨部門工作時，部門之間要多協調溝通，令佢工作更容易。唐唐開到口叫公務員做好啲，等佢煩少啲，此話一出，惹來有份出席場合嘅前保安局局長葉劉淑儀不滿，批評呢句話有卸責成分！
葉太話，唐唐作為政務司司長，職責就係處理棘手問題，扮演協調及統籌人角色，當其他部門阿頭揸唔到主意，佢就應該表現得果斷啲，站出來主持大局，而唔係將個波踢畀下屬。講到呢度，葉太仍然意猶未盡，暗寸唐唐要帶頭做個好榜樣，而唔係一味叫公務員做好啲。
其實唐唐講錯嘢屢有前科，今次喺公務員隊伍面前失埋分，認真失禮，好彩佢喺發言尾段打番張溫情牌，提醒公務員努力工作之餘，唔好忘記注意健康，留多啲時間陪吓屋企人。我哋問唐唐有冇做詳細嘅心臟檢查，佢笑住連點幾吓頭，然後快步走人；以佢咁錫身，勤做體檢都好正常啫。