中文大學校董會早前「轉莊」，由銀行大班鄭海泉接替鄭維健做校董會主席，今次就輪到香港大學。政府尋日公布，委任港大校友梁智鴻擔任校務委員會主席、即校董會主席，任期由十一月七日起，為期三年，現任主席馮國經就功成身退。其實梁智鴻同馮國經有個共同點，做呢個位嗰陣，大家都係行政會議成員，同政府嘅關係好密切，今次交棒相信無難度。
梁智鴻同港大好有淵源，佢一九六二年畢業於港大醫學院，六四年開始喺醫學院工作，一做就做咗十四年，離開港大後亦曾重返母校擔任名譽外科教授，由二○○四年起仲做埋校務委員會成員，早前港大有多個教授同學生捲入官非，梁智鴻都出到聲話好關注，諗唔到依家佢仲做埋校務委員會主席。
至於現任主席馮國經，佢由○三年起擔任校務委員會主席，任內經歷港大醫學院命名風波同私家症收帳問題，處理手法好唔好就見仁見智，不過喺馮國經領導下，港大嘅國際排名的確愈來愈高，連教育局局長孫明揚都盛讚不已，港大呢幾年有好好嘅發展，「亞洲第一」呢項榮耀得來絕非偶然，真係馮國經多年耕耘嘅最佳回報。