搞邊科呢？撞乜鬼呢？想撞鬼就去海洋公園啦，聽講「全城哈囉喂」可以畀你一次過撞晒百年香港鬼，額外附送生人勿近臭死鬼，因為嘩鬼演員投訴戲服原來唔係日日洗，污糟邋遢，蔫崩爛臭。

功夫茶講嘅唔係呢種撞鬼，而係愈窮愈見鬼。根據社會服務聯會分析政府統計處數據顯示，香港窮人數目又創新高，多達一百二十四萬人，你都咪話唔得人驚！

社聯業務總監蔡海偉認為，貧富懸殊不斷加劇，市民整體怨氣高企，將會加大政府管治壓力。呢個講法，其實講得相當溫文爾雅。大家睇番歷史吖，古今中外但凡社會動亂，十居其九同窮人冇飯食有關，法國大革命為乜事幹要斬咗瑪麗皇后個頭呀？因為傳聞佢冇有識死，對貧苦大眾講咗一句「何不食蛋糕」，眾怒難犯吖嘛，送佢上斷頭台囉。

香港七百萬人口，居然有一百二十四萬個窮人，唔好話功夫茶嚇鬼你，只要其中百分之一作反，已經講緊一萬個爛命一條發窮惡嘅惡人。呢家嘢，唔止管治壓力咁簡單，直情係管治危機！

貧富懸殊咁嚴重，正常嚟講，號稱以民為本嘅特區政府係咪要扶貧呀？係咪要改善就業環境呀？係咪要畀民眾有三餐溫飽呀？荒謬絕倫嘅係，政府好似嫌香港窮人未夠多，唔去諗諗計仔扶扶貧，反而落井下石搞搞震，帶頭做無良僱主壓榨外判合約工人喎。

嗱嗱嗱，呢啲就係功夫茶所講嘅愈窮愈見鬼嘞。冇耐之前，屋宇署、機電署、懲教署、康文署嘅外判公司，已經大幅削減工人薪酬，家陣又輪到水務署。工會接獲投訴，水務署負責資料輸入嘅外判合約今年七月轉換承辦商，新合約訂明臨時文書助理月薪只有四千九百五十元，較原本六千元大幅減少超過一成七。薪金低成咁，開飯當然非常頭痛，唯一好處係唔使供強積金。

政府做咗無良僱主，咁又點呢？你做初一，我做十五，嬲到火遮眼嘅工會話喎，官逼民反之下籌組「政府外判工大聯盟」，將會發起簽名、遊行甚至罷工等等大型工業行動，一於抗爭到底。

試想想，公務員一話減薪百分之五啫，一個二個已經嘈到拆天，政府外判工減薪幅度居然超過一成七，冇人話要衝入禮賓府已經算畀面。

月區區六千元已經窮，月不足五千元更加窮，呢個帶頭壓榨外判工嘅政府，簡直就係嫌你窮得未夠苦，索性剝埋你條褲！

計功夫茶話齋，煲呔曾如果繼續漠視民困，任由官僚剝削工人，一手一腳製造貧窮，去教堂望彌撒嘅時候最好跪求天主打救，祈求唔好有人振臂一呼率眾作反。你知啦，官逼民反呢家嘢，真係撞晒鬼㗎！