向來硬銷專業形象嘅公文袋，三年前成立後就喺灣仔一棟甲級寫字樓落腳，呢個坐擁維港景色嘅總部好快就會成為歷史，事關佢哋下個月初就要搬去北角一棟工廠大廈，雖然地方大咗、租金平咗，但同佢哋嘅形象就唔多襯啦，係咪有少少跌Watt呢？
公文袋秘書長陳家洛尋日向傳媒宣布，佢哋十月六日正式搬遷，新竇大概十月九日正式運作。呢個新竇位處北角區，夾喺港鐵天后同炮台山站中間嘅一棟工廠大廈二樓，面積三千呎，租金大約十五蚊呎。陳家洛話，比起依家用緊大約二千呎嘅灣仔寫字樓，好處係地方大咗，適合個黨長遠發展，而且去維園搞年宵同遊行都方便啲喎！
不過講到尾都係要向現實低頭，事關灣仔寫字樓個業主加租，由十四蚊加到十八蚊，為咗慳錢，佢哋連冷氣機都搬埋。尋日見佢哋個會議室天花板穿咗個大窿，原來個位置本來係冷氣機位，但佢哋已經拆咗落嚟搬去新竇用。所以話呢，孭起個黨就好似孭起頭家一樣，係唔容易嘅，只係諗唔到公文袋搬竇都跌Watt。