在位長達十六年嘅金管局總裁任志剛聽日就正式退休，由被視為煲呔曾愛將嘅陳德霖頂上，依家連佢老細鬍鬚曾都入埋院，財經事務及庫務局局長陳家強亦可能要上京睇閱兵，如果本港金融市場喺呢幾日突然爆出大鑊，畀人有機會借機炒作興風作浪，香港市民真係冇眼睇。

唐唐尋日探完鬍鬚曾後，特別喺醫院現場舉行咗個簡短記者會，仲拉埋周一鑊、醫管局行政總裁蘇利民、同負責幫鬍鬚曾做通波仔手術嘅資深心臟內科專家李偉聯做布景板，原意正係想話畀全港市民同市場人士聽，鬍鬚曾嘅手術相當成功，好快可以康復出院，整個政府同香港嘅金融監管制度一切運作正常，避免有人作不必要揣測。

不過「人算不如天算」，李醫生喺講解鬍鬚曾病情時，欲言又止講得唔係好清楚，佢話鬍鬚曾患咗「急性心臟病」，入院時「情況比較緊張」，又話「如果」鬍鬚曾嘅康復進度保持到，就「應該」可以完全康復。記者於是追問佢鬍鬚曾入院時有冇生命危險？佢又點到即止，淨係答咗「有危險」三個字，令人產生無限聯想。

CY唔趁墟齋送慰問卡

記者要求李醫生進一步解釋點樣危險時，呢個時候周一鑊就好冇禮貌喺側邊插嘴打斷佢講話，話「唔好講咁多嘢喇，李醫生要趕番去做嘢」，草草結束記者會，打發李醫生離開，令外界對鬍鬚曾嘅病情多咗疑問，少咗答案。

我哋尋日喺香港會門口撞到行會召集人梁振英（CY），問佢計劃幾時去探鬍鬚曾。佢就話唔會喇，原來佢同幾位行會非官守議員啱啱先喺尋日嘅例行午餐會上討論過有關問題。佢哋認為財政司司長係一個好敏感嘅職位，既然鬍鬚曾手術成功好快出院，就無謂再勞師動眾拉大隊去醫院騷擾佢，以免外界覺得今次真係好大件事，增添外界揣測！佢哋最後集體簽咗張慰問卡畀鬍鬚曾。CY咁講，言談間似乎喺度暗寸唐唐；唔知唐唐識唔識得咁諗呢？