本文重點
港區人大、政協同心建港聽得多，一齊街頭推車你聽過未？上星期四晚嘅灣仔伊館有個香港僑界社團聯會十．一酒會，散場後名車群集等接老闆，突然一架英倫豪華房車Bentley以慢速溜後，衝向後面民政事務局常秘尤曾家麗嘅高官座駕，就喺千鈞一髮之際，司機即時在車尾頂實部車，而港區政協王國強與一名貌似人大代表盧瑞安嘅男人就幫手築起血肉城牆，狀似超人咁喺車尾推住部車，等司機走上車拉手掣。
夾肥尤顏寶鈴座駕之間
卓妮翻查資料，發現險釀成意外嘅名貴黑色Bentley，屬Arange T 4-DR Saloon型號，價值三百六十萬，為前保良局主席顏寶鈴旗下公司擁有，事發時泊正喺尤太部「AM15」座駕前面約兩呎距離。身兼九龍城區議會主席嘅王國強同卓妮憶述當晚情況，佢話當時酒會剛完，佢等緊自己嘅司機嚟接走，忽然見到一架「又新又靚」嘅Bentley溜後，下意識就立即衝上去，用雙手推住車尾，希望阻止意外發生。
王國強果然寶刀未老，用力一推架車溜後咗一下就停定，司機亦迅速跳上車拉手掣，最終佢在顏寶鈴同肥尤兩架車之間全身而退。睇番張相，千鈞一髮之際同王國強一齊奮力推車嘅，仲有一名貌似港區人大、中旅集團執行董事盧瑞安嘅男士，但係王國強話無留意到身邊有人，只係記得盧瑞安當晚的確有出席酒會。
話時話，Bentley呢部歐洲車有幾噸重，加上伊館外嘅愛群道有輕微暗斜，企圖人肉頂住部咁重嘅車，等於螳臂當車，說到底都係人命重要啲，頂唔住隨時變成顏寶鈴同肥尤座駕之間嘅「三文治餡料」，唔怪得事後王國強都大呼「好彩」啦！
當晚酒會散場，嘉賓魚貫而出，卓妮見尤太同民政事務總署署長陳甘美華在行人路等車期間目睹事發經過，但顏寶鈴就唔多覺眼，唔知顏寶鈴知唔知王國強曾經仗義相助呢？
卓妮