全國人大常委范徐麗泰兒子范駿華（Andrew）近年開始喺青年團體露頭角，繼進身香港青年聯會核心後，最近牽頭成立滬港青年交流促進會，尋日舉行就職禮。兒子初擔大旗，范太無到場支持，原因係去咗日本旅行，反而范太嘅金蘭姐妹前律政司司長梁愛詩，幾忙都現身擔任主禮嘉賓，為世姪打氣。
滬港青年交流促進會係香港青聯同上海青聯嘅長遠合作平台，頭炮大製作係為二○一○年上海世博會招募二千名香港青年義工，尋日順便做埋招募啟動儀式，上海方面以行動力撐，派世博會執委會副主任周漢民南下，上海市統戰部同市共青團領導頭號人物亦畀面捧場。最近「十‧一」酒會如雨後春筍，政界中人唔少都「食到滯」，尋日就職禮上，香港政界面孔唔算多，不過，Andrew請到詩姐一個就夠晒，吸引咗大批傳媒到場，想問佢點睇最近嘅泛民總辭發展，雖然詩姐最後無講嘢，但客觀上已經發揮到支持世姪嘅效果。
Andrew話，詩姐係經促進會正式邀請，范太亦「有開聲」，而最重要嘅，係「Auntie Elsie（梁的洋名）都識得我嘅。」Andrew又解釋，話范太嚟唔到係因為「撞咗期」，家姐范凌華請咗媽咪去日本旅行，跟住媽咪又要上去北京參觀閱兵，上海賓客公務繁忙，「梗係遷就客人緊要過遷就媽咪啦」，講嘢果然好得體！