分區計劃大綱圖惹爭議

娥姐尋日喺「都市氣候與都市綠化」研討會上致詞時，如數家珍列舉佢手上有乜工作同環保建築有關，但講每一項都加番句有乜阻滯，好似全港有一百零八幅規定發展限制嘅「分區計劃大綱圖」，有一半有待深入檢討，依家只係做咗十三幅圖，已經招來大量爭議，無論收緊高度限制定係發展密度都有人反對，好彩總算有公眾喺佢背後支持，工作先至可以繼續落去。

發展局另一項工作就係訂定綠化總綱圖，娥姐爆料話當年政府工程大減，土木工程拓展署無嘢做先搞綠化，點知依家成為主力工作，仲預計會花十六億去做。娥姐講笑話，佢屬下班工程師「終於學識無論鍾唔鍾意，都一定要做公眾諮詢」，即係話唔係有民意做後盾，都幾難過關斬將啦！

愈管愈多嘅娥姐連樹木管理都攬埋上身，不過娥姐話，專業團體同關注人士只係掛住要求訂立樹木保護法，對樹木管理專責小組報告就唔多識欣賞，令佢非常失望，惟有嚟緊加緊宣傳推廣，希望有多啲人支持，等立法會班尊貴議員明白到開設樹木管理辦事處嘅好處，肯開水喉撥款畀佢開新職位搞好「樹木辦」。

娥姐提及嘅棘手工作名單仲有「發水樓」諮詢文件，以及私人發展內公共空間嘅開放管理問題。雖然面對咁多阻滯，不過娥姐好明顯無有怕，仲安慰自己「有危先有機」，話做官做咗卅年，知道要推動政策或者要攞資源撥款嘅最佳方式，就係喺有危機出現嘅時候喎！睇嚟娥姐好有信心，打算繼續過關斬將，唔知有冇機會更上層樓呢？