今年雙春兼閏月，政商界喜事接踵而來，卓妮就八到貿易發展局主席蘇澤光（Jack So）尋日嫁女，榮升外父。Jack So有兩名千金，包括大女國欣（Karen）及細女國湄（Emily），今次係大女Karen與任職高盛投資嘅同事兼男友羅康迪（Eric）拉埋天窗，尋日喺九龍塘聖公會基督堂行禮，傍晚再到香港會舉行酒會，政界名人及商界大孖沙紛紛畀面到賀。
卓妮尋日去過教堂及酒會，見Jack So神采飛揚招呼賓客。問Jack So係咪開心到瞓唔着？他笑稱：「瞓得着，瞓得着！」咁今次嫁女咪多咗半邊仔？他依然笑不攏嘴話：「係啦，希望係咁啦，唔好嫁咗個女去嘛！」大女嫁咗人，幾時輪到細女Emily呢？佢笑笑口話：「係囉，你幫我問吓Emily幾時結婚啦！」
政商界畀面到賀
Jack So喺商界長袖善舞，雖然離開電盈咁耐，好多商界大孖沙依然畀面到賀，包括新世界主席鄭裕彤、大新銀行主席王守業夫婦、嘉華集團主席呂志和、利豐主席馮國經、縱橫二千集團主席田北辰夫婦及女兒、全國政協黃楚標夫婦及女兒Emma及包陪慶等，政界就有行會召集人梁振英、行會成員張建東及查史美倫、立法會議員石禮謙、商務及經濟發展局局長劉吳惠蘭等。
黃楚標與Jack So最老友，相識十幾年，標哥可說是睇住Karen成長，所以特別叫女兒Emma幫手做花女，又打造咗一對黃金公公婆婆公仔畀Karen，祝願一對新人白頭偕老。標哥與Jack So幾乎每星期都會打一次高球切磋球技，邊個好波啲？標哥爆料，話近期Jack So經常厚臉皮叫佢讓賽，一讓就讓十桿，搞到佢成日輸波，連牙骹都輸埋。
田北辰（Michael）同Jack So都好有淵源，Michael大女兒與Karen青梅竹馬，小學一齊讀女拔萃，又在英國讀中學時相遇，好有緣分，當年大家仲講好睇吓將來邊個嫁先，未嫁得嗰個就會做對方嘅伴娘，估唔到畀Karen搶先一步嫁人。不過，Michael女兒尋日都帶埋靚仔外籍男友現身，相信都好事近啦！
彤叔話唔理純官
「彤叔」鄭裕彤尋日人到禮到，話打咗對金鈪恭賀Jack So嫁女。問彤叔點睇兒子鄭家純傳出緋聞及同立法會打官司，彤叔首次開腔回應：「佢（純官）啲嘢我唔理，一向都唔會過問嘅！」
卓妮