大埔游泳池為區內大型泳池，設施齊備，除標準池外亦設有滑水梯、跳水池、習泳池、嬉水池等，每逢夏天均擠滿泳客，當中尤以兩組各有三條、分別設計成螺旋形及波浪形的滑水梯特別受歡迎。不過，由於今個泳季有多條滑水梯封閉維修，令泳客大感掃興。

只開兩條 常現人龍

泳池常客侯先生經常帶同兒子前往戲水，發現滑水梯過去一年未曾全面開放過，經常令兒子未能盡興而回，「我個仔好鍾意玩滑梯，但成日開得嗰一、兩條，搞到成日排晒隊等玩，都唔知整乜要整咁耐！」侯指去年已知悉部分滑水梯需進行維修，未料至今仍未修妥，不滿康文署維修「慢吞吞」。記者多次前往泳池了解，每次均發現有數條滑水梯被封，只餘下一、兩條滑水梯開放，泳客則在入口處排隊輪候，更不時乍現人龍。

大埔區區議員譚榮勳批評康文署維修效率緩慢，令市民無法享用設施，「十幾年前香港都有水上樂園，嗰時人哋都可以確保設施百分百開放，今時今日整幾條滑水梯都搞咁耐，你叫市民點接受？」

李先生（右）：「既然有呢啲設施就唔應該封，小朋友好鍾意玩㗎嘛！要整都唔使咁耐呀？」	何同學：「好似成個夏天都係開唔足六條滑水梯，都唔知點解唔開。」	吳太（右）：「又唔係冇救生員，就算有問題都應該喺泳季前整好晒啦，唔係泳季先嚟整囉！」

管理不善 浪費設施

「我完全睇唔到個困難喺邊度，維修滑水梯咁簡單都要搞咁耐，好令人質疑佢（康文署）嘅管理能力！」立法會民政事務委員會委員陳克勤指摘康文署，未有好好利用長達五個月的非泳季時間完成維修工作，白白浪費設施，要求當局交代維修超過一年之因由。

康文署發言人指出，有關滑水梯已使用逾十年，部分組件開始老化，年前已將兩條滑水梯更換，其後於今年五月初，其中一條滑水梯有脫色及表面不平滑情況，已即時暫停開放；及至六月至八月期間，另外三條滑水梯亦相繼出現問題，故有四條滑水梯在泳季期間間歇性封閉以進行小型維修工程。該署已要求建築署加快維修進度，預計將於冬季封池後進行大型維修工程。

■記者 柯翠菡