柳葉眉菩薩心

首先面形一定要係鵝蛋臉，因為據美容學家指出，只有呢種下巴尖長嘅面形，至可以喺任何角度，都協調到五官嘅比例，令外形輪廓更明顯，能充分體現五官嘅線條美，就算五官唔好都可以因面形補救得到。

其次一定要有對柳葉眉，眉嘅大小粗幼以纖幼為最好，而且彎曲嘅幅度，愈彎愈理想，由眉頭至眉尾呈弧形，生有呢種眉毛嘅女性，心地特別善良，講嘢時會陰聲細氣，溫柔體貼，絕對係賢妻良母嘅首選。擁有呢種眉嘅女性，特別易受男士歡迎，一來受其溫柔所感染，願成為其裙下之臣，二來呢種女性特別畀人一種高雅嘅感覺，很受男士嘅尊崇，會無條件支持和保護佢，所以演藝圈嘅女性一定要有呢種眉。

孩子眼好天真

除咗面與眉之外，梁師傅話仲要眼鼻相配，眼睛要又圓又大，仲要有神，即係有光亮嘅感覺，眼大無神咁就冇用，相學稱呢啲眼做杏子眼或者係孩子眼，有呢種眼嘅囡囡，畀人小孩般嘅可愛，易成為萬人迷。擁有此眼形嘅朋友，性格上亦同小朋友差唔多，就係思想單純、對事好奇、喜歡發問、同埋好易相信人，因而經常受騙，特別係凡事愛發問，容易給異性帶嚟誤會，於是緋聞不斷，如果加埋水汪汪就更麻煩。

至於鼻哥方面，好多女星紅咗幾十年，一直做到幾十歲，都嫁杏無期，佢哋啲鼻就係又高又直，所以梁師傅話，套用古時女性福相，最好有一個豬膽鼻，不需太高太直，只要鼻頭有肉，聚財享到夫福就可以。

櫻桃嘴夠專一

最後就要睇埋個嘴，乜嘢嘴形最容易令人一見鍾情？當然係櫻桃小嘴，因為嘴形細小配埋尖小嘅下巴，就會十分相配，視覺效果最佳，自古以來，中國文人嘅審美標準，都係以嘴形小巧為主，就係咁嘅原因。而喺相學上，擁有櫻桃小嘴嘅女性，性格比較保守，安於現狀，喜歡腳踏實地，唔會好高鶩遠，所以只會專注喺一方面發展，容易喺嗰方面取得成就，感情生活亦會從一而終，絕對唔會紅杏出牆。

上天賜與嘅面相人人唔同，想成為容易令人一見鍾情嘅萬人迷，其實除咗面相之外，個人修養同品格都十分重要，呢方面就要靠自己後天嘅努力，才會取得滿意嘅成果，單靠面相好壞，最終亦會無法令人接受。

撰文：堅

鳴謝：玄學家梁瑋鈞師傅