呢嗱，最新一期《風險通報》又自爆幾宗嚴重事故啦。其中一單有醫護人員喺進行手術前按程序對病人完成核查，但負責做手術嘅醫生竟然仲會剝錯牙，原本應該要剝嘅右邊智慧齒原封不動，卻剝錯咗左邊嘅智慧齒，左右不分，你話烏唔烏龍吖。

另一單仲騎呢，有一名病人到門診進行眼睛激光治療，醫生叫名時，病人誤以為係叫佢，入到去激光治療室，醫護人員冇Check真佢個身份就郁手，直到病人後尾再聽到有醫生叫佢個名時，至知道原來係張冠李戴，做錯咗治療。

公立醫院做手術錯漏百出已經係出晒名，就算做完手術，烏龍嘢一樣咁多，病人甩咗喉隨時冇人知有之、呼吸機閂咗冇人理有之，要幾荒誕有幾荒誕，講都冇人信呀！

其實又唔使大驚小怪嘅，正所謂「狗咬人唔奇，人咬狗至奇」，依家公立醫院七國咁亂，有醫療失誤有乜奇吖，反而如果有日冇醫療失誤，咁先至係阿奇生阿奇，奇上奇呀！

遠嘅唔講，講番東區醫院最近發生嗰單，醫生將浸有抗癌藥嘅棉塊遺留喺做過手術嘅青光眼病人眼內，令病人又要捱多一刀取回殘留物，仲要承受變盲嘅風險。對於呢單烏龍嘢，港島東醫院聯網行政總監任燕珍有乜反應呢？佢當然見怪不怪啦，仲死撐醫護人員喺手術過程中好小心，事件係非常罕見嘅意外。

喂，試問有邊次醫療失誤唔係罕見呢？有病人無端端被輸入一包受螢光假單胞菌污染嘅血，據講出現呢種錯誤嘅機會率係一百萬分之一，咁夠唔夠罕見？北區醫院錯調化驗樣本、錯誤切除病人嘅乳房，又夠唔夠罕見？

呢，話口未完，北區醫院急症室又懷疑發生醫療失誤，令到一位青年H3流感枉死，一樣係非常罕見啦。奇就奇在，無論幾罕見嘅醫療失誤，都可以喺公立醫院出現，真係唔到你唔服。

食物及衞生局局長周一嶽又出嚟死撐，佢話喎，醫管局有一定嘅機制處理醫療事故，要求以較為公開和透明嘅態度，令工作人員工作時分外小心。

唉，公開和透明有鬼用咩，醫管局上樑不正下樑歪，前線醫護人員肯改至得㗎，劑劑發生醫療事故，當局有邊一次唔係大事化小、小事化無，不斷地修改指引、不停地發表事故調查報告，只不過係大龍鳳，過咗風頭火勢，例牌係不了了之。你有你通報，佢有佢繼續犯錯，吹脹！

所以小市民入公立醫院最好打定輸數，自求多福，冇割錯器官輸錯血，冇成為《風險通報》中嘅受害者，已經要劏雞還神咯。