接手「三碌拎」無耐嘅昂坪纜車董事總經理李殷泰（YT），上任兩個月後尋日出來同傳媒食飯。雖然上手張少華已經將「三碌拎」搞番生，YT仍然滿腹大計，一時話搞夜航，一時又話高清版水晶車，仲買埋全球半古董纜車車廂返來搞展覽，但問到佢會唔會學兩個老牌主題公園搞萬聖節活動，佢就耍手兼擰頭話：「我佛慈悲，啲妖魔鬼怪統統唔會出來！」講到明唔敢「搞鬼」。仲記得三碌拎動工前，身為鄰居嘅寶蓮禪寺方丈智慧大法師堅決反對，依家既然同寶蓮寺有偈傾，仲將大佛着晒燈夾埋一齊搞夜航，就梗係唔好生事，免得騷擾佛門清淨地喇！
講番YT，睇佢個樣以為好嚴肅，原來都幾識搞笑。佢話啲記者個個叫佢「李生」，其實同事都叫開佢做YT（李的名字英文縮寫），佢話各位傳媒朋友唔記得唔緊要，記住「點解要飲茶就得！（Why Tea？）」YT又話，兩個月來不停了解纜車系統運作，仲試過由東涌行山路上昂坪，視察吓轉向站，仲曬黑咗唔少，好在自己鍾意行山，諗諗吓或者可以搞埋野外定向活動，又度多條宣傳橋。