其實阿姐同城大早有淵源，○七年早就做咗城大文學榮譽博士。尋日剛由三藩市開完演唱會返港嘅汪阿姐，時差都未適應就趕去宣傳粵劇，郭位遇上呢位大老倌，即時變身小粉絲，乖乖聽阿姐介紹粵劇發展史。郭位好坦白，直言對粵劇一竅不通，歌喉更加唔見得人，但自細跟父母聽京劇、粵曲，畀呢種藝術文化深深吸引，希望香港邁向國際化之同時，唔好忘記保存固有文化喎，郭位咁識貨，阿姐聽見都笑逐顏開，果然冇搵錯地方擺展覽，可惜郭位要趕下場，未有時間同偶像傾多幾句。

「十‧一」臨近，阿姐將以全國政協委員身份上京，問佢會否以最愛嘅旗袍裝亮相國宴或者閱兵儀式，阿姐話未諗到着乜，不過睇閱兵就預咗企兩粒幾鐘，都係着對波鞋或者平底鞋舒服啲，但防曬膏就懶得搽，盡情吸收吓北京陽光喎。