個人資料私隱專員吳斌最近頻頻同政府開火，首先係篤爆政府嘅校園驗毒計劃可能侵犯私隱，之後又公開批評政府唔畀私隱公署擴權，須知煲呔曾出名小器，好多人都估吳斌會喺明年八月約滿後拜拜離任，冇得留低。不過啱啱獲行政會議通過保留政府部門身份嘅香港電台，尋日就喺即時新聞報道吳斌獲續任兩年，唔通煲呔曾轉咗死性？
睇番呢段新聞嘅詳細內容，再對比番尋日憲報刊登嘅政府公告，就知道係一場美麗的誤會，皆因今次獲續任兩年嘅其實係個人資料（私隱）諮詢委員會嘅一般成員，吳斌雖然係呢個委員會嘅當然主席，但佢作為私隱專員嘅任期同個委員會嘅任期，根本係兩回事，但港台就將兩者混為一談。
港台今次報錯新聞，政府新聞處都有啲責任，因為後者喺新聞稿度一方面話吳斌係委員會嘅其中一名成員，另一方面又話委員會成員嘅任期為兩年，的確好容易令人誤會，難怪新聞處傍晚時再次出稿澄清，變相要幫港台更正。