政府搞廣深港高鐵搞出大頭佛，要收地拆村嘅石崗菜園村，抗爭行動無日無之，負責拆彈嘅運輸及房屋局副局長邱誠武當然要落村了解，但佢唔係光明正大出席居民大會，反而借探訪教友為名，微服出巡去探聽遷拆戶嘅訴求，差啲搞出邱副局隱姓埋名「呃阿婆套料」嘅誤會。
話說今年五月下旬，邱誠武同教友去咗錦上路菜園村河畔嘅福音農莊，探望年逾七十六歲高齡嘅莊主霞姐陳錦霞，據聞兩個人言談甚歡，期間邱誠武一輪嘴問咗霞姐好多問題，好似如果佢嘅福音農莊要清拆，佢有乜訴求？畀番地佢種嘢、做番農莊好唔好？搵義工幫佢手又如何？畀多啲賠償又點呢？你知唔知菜園村啲人有乜訴求……霞姐就話農莊係佢第二生命，點都唔走，又話唔可以代菜園村居民答問題，即係冇得傾！
不過事隔數月，霞姐尋日打上電台爆咗單嘢出嚟，我哋尋日登門造訪，霞姐先醒起原來當日佢嫌邱誠武全名難記，「阿武」個名「無無聲唔好聽」，建議佢不如改名做「阿有」，不過霞姐就一口咬定，邱誠武當日由頭到尾都無表明自己嘅副局身份，莫非暗示邱副局有心陰佢？
