一個星期陷入真空狀態

據憲報刊登，有份喺「十‧一」期間署任局長、為直屬老闆上京出一分力嘅副局長，有民政事務局嘅許曉暉、環境局潘潔、商務及經濟發展局蘇錦樑、財經事務及庫務局梁鳳儀，仲有食物及衞生局梁卓偉，最早由廿八日開始「頂更」，全部到十月三日停止署任，再加「孫公」孫明揚留守署任政務司司長，「娥姐」林鄭月娥極有機會署任財政司司長，即係佔咗三司十二局嘅一半，仲未計冇副局長署任、冇為北上登憲報嘅其他局長；即係話，港府領導層有一個星期幾乎陷入真空狀態。

五個要頂更嘅副局長，顯著政績大家睇唔到，「甩轆」就有目共睹，好似蘇錦樑嘅「Show卡片」事件、潘潔同梁卓偉又被立法會議員分別投訴「十問九唔知」同唔熟政策，梁鳳儀就出名無人識。呢班副局長連自己都照顧唔掂，依家要佢哋頂住港府半邊天，係咪好牙煙先？如果撞口中，下星期港府有乜頭暈身㷫，由呢班副局長做救火隊，隨時變火上加油，到時副局政助制度始作俑者煲呔曾就知乜嘢叫自作自受。

北京嚴陣以待保安嚴密

港府十‧一期間擺空城計，北京就嚴陣以待，今年保安異常嚴密，港區人大、政協入住被安排嘅酒店，人人持專證出入，隨身工作人員同家人一律唔可以越雷池半步。

今次香港有份上京嘅，主要有人大、政協系統，同埋特區政府出面邀請嘅觀禮團兩路人馬。根據內地體制，接待有一定規格，人大、政協住北京飯店，貴賓樓安排畀外國政要，特區團住港澳中心。仲有，港區人士好多都有機會閱兵，但可以上天安門樓頭嘅只有廿幾人，包括全國人大常委范徐麗泰、十六名全國政協常委、特區特首司長同城中幾個超級富豪，其他人留番喺廣場觀賞。閱兵十‧一早上九點開始，維持兩粒半鐘，參觀者要提早喺七點出發，散場又預半粒鐘至走到，即係焗住企定定五粒鐘，真係少啲腳骨力都唔掂。