卓妮去到晚宴會場，先後見到發展局局長林鄭月娥及常秘周達明、運輸及房屋局局長鄭汝樺、環境局局長邱騰華、財經事務及庫務局常秘區璟智、商務及經濟發展局常秘蔡瑩璧、環保署署長王倩儀、審計署署長鄧國斌，而食物及衞生局局長周一鑊和副局長梁卓偉就孖必到場。

鄭汝樺（左三）、周達明（左一）喺晚宴上與律師會會長王桂壎等多位專業人士合照。	左起：區璟智、蔡瑩璧及王倩儀齊齊去撐梁振英為首嘅一班專業人士。	林鄭月娥（右）及梁卓偉（左）都有份捧專業聯盟嘅場。

CY獻唱推高潮

雖然專業聯盟同好多政策局有緊密關係，但CY有意參選下一屆特首已呼之欲出，高官都不避嫌出席，莫非當係買定保險？無論點都好，CY本人就相當陶醉，同晚宴籌委會主席、醫學會副會長周伯展醫生上台獻唱一曲《歌唱祖國》，將晚宴推向高潮，CY仲訂造一個大蛋糕，寫上「專業發展，共創和諧，繁榮昌盛，國泰民安」十六字，十足醒獅旁白，話表達香港專業界嘅心聲。

晚宴開始前嘅酒會，卓妮見「頭箍小姐」區璟智同蔡瑩璧傾到雞啄唔斷，原來兩人八至九月前後腳去完意大利地中海沿岸嘅Cinque Terre（五漁村）自駕遊，五漁村小鎮係以一層層依臨海山崖而建嘅彩色房屋而聞名，已被列入世界文化遺產，兩人大讚呢個地方靚到不得了，見到好多梯田、葡萄園及橄欖樹，但缺點係山路彎位太多，開車要格外留神。

當然山長水遠去到，梗係要帶番啲嘢走啦，蔡瑩璧話買咗四支紅酒返屋企慢慢歎，至於區璟智買咗乜？唔使講都估到，就係買咗個頭箍，乜嘢牌子就唔肯講，總之係佢心愛嘅款式啦！