正常梗係第一時間撲出去落足嘴頭全力推銷：先生點稱呼呀？身邊呢位貌美如花嘅靚女梗係你女朋友嘞，我呢個單位呀，坐北向南好好風水㗎，裝修又正喎，租金又平喎……

之不過咁，世事無奇不有，好多人唔係好正常㗎咋，例如食環署大官小吏。食環署毫無疑問係樓王，手上可供出租嘅物業多到數唔晒，淨係一個街市，已經可以分拆幾十個檔位出租。問題係，呢個樓王應該係全香港最嫌錢腥嘅，有人主動話要租用街市檔位，哈，食環署乜鬼反應都冇喎，吹脹！

呢嗱，充滿集體回憶嘅牛頭角下邨就快清拆嘞，邨內經營食肆三十幾年嘅吳先生諗住蟬過別枝啦，改去牛頭角街市熟食中心開檔做生意。吳先生兩年前已經發覺嗰度有三個空置檔位，當時已經向食環署查詢招標日期，去年底成功租到其中一個檔位。好嘞，其餘兩個又點呢？吳先生一次又一次查問食環署，署方一次又一次支吾以對，永世答唔出幾時先至可以招標。換言之，嗰兩個檔位前前後後空置兩年，有人想租用，署方唔出租，有錢都懶得去執。

講到呢度，大家可能仲未睇到成件事嘅荒謬性，兩個檔位之嘛，濕濕碎碎，好小事啫。咁就不如等功夫茶為大家描述一幅大圖畫。

○三年喎，審計署發表報告，批評食環署對公眾街市管理不善，導致檔位長期空置。事隔五年之後，即係舊年十一月，審計署再一次發表報告，再一次批評食環署對公眾街市管理不善，繼續導致檔位長期空置。空置成點呢？犀利咯，一百零四個公眾街市之中，三十四個空置率高達百分之三十以上，全港八成公眾街市虧蝕，一年損失一億六千萬公帑！

睇完大圖畫，睇番小圖畫。吳先生兩年前已經對牛頭角街市熟食中心兩個檔位有興趣，即係有人自動獻身啦，蝕到阿媽都唔認得嘅食環署居然唔睬對方兩年，你話係咪荒謬到冇朋友吖？

有檔冇人租，有人冇檔租，呢個就係食環署嘅搞笑管理模式嘞。

或者可以咁樣理解，食環署署長卓永興係典型二世祖，阿爸剩落大把物業收租，之但係又唔識得積極招租，佢最大興趣係咬住支煙、托住籠雀無所事事招搖過市，心思思想調戲良家婦女又唔夠膽，閒來約埋幾個豬朋狗友鬥雞鬥蟋蟀，卒之搞到租客走晒，物業十室九空，二世祖變咗敗家仔。

話時話，檔位空置兩年咁耐，點都應該有個理由啩。原來喎，根據區議員挖番嚟嘅料，兩個檔位嘅原檔主兩年前着草走佬，食環署一直想搵番佢哋負責將檔位還原，之後先至出租，所以一拖至今。真係唔知好嬲定好笑，人哋着草一世，唔通你空置一世咯喎？你唔識得自行還原，再去追討賠償嘅咩？睇嚟，食環署應該係史上最蠢嘅敗家仔！