做新人係咪一定要有啲犧牲呢？呢個問題問吓立法會新丁陳克勤可能就有答案。話說佢尋日出席咗個新聞發布會，手持結他入型入格，成個Rock友咁款，就係為咗幫手宣傳今個星期六喺文化中心大樓梯搞嘅音樂會。不過問清楚至知，原來克勤仔根本係音樂白癡，除咗唔識彈結他，佢仲自爆五音不全，唱歌可能會嚇親人喎！
其實克勤仔「假大胸」扮Rock，都不過喺想搞啲Gimmick等個宣傳效果好睇啲，如果佢到時上台表演埋一份，應該回響仲大嘞！點知克勤仔即刻耍手擰頭，原來佢本來都有諗過去上個結他速成班，就好似啲男仔追女朋友時，專登練隻情歌氹人一樣，等到時可以真正「身體力行」支持音樂會。但佢諗多兩諗，都係覺得要學搖滾樂同電子結他難度實在係太高，為免嚇親街坊，都係喺心底默默支持就算喎！
不過克勤仔嘅支持似乎唔係太徹底，因為喺音樂會演出當晚佢有其他公務在身，無得親身支持；但佢已經諗掂數補飛，等下星期日音樂會移師沙田時，再親自去捧場。