周二係本港首個「無車日」，一眾高官齊齊響應，被迫做騷一日，唔坐三千cc以上的官車上班一日咁大把，尤其「氣候逃犯」煲呔曾被迫步行一條街上班，被五十多間傳媒追訪，真係紅過映山紅！

行一行，血液暢運，對上了年紀的人肯定係好事。老朽早年在《讀者文摘》睇過一篇文章，題目好似叫《死於汽車》，內容係話揸慣私家車的人，幾乎兩步路都唔肯行，出入汽車，上落靠升降機，結果四肢退縮、心臟弱化，城市文明人，較易提早拜拜！

政府一眾高官的「無車日」，姿勢多於一切，唔搭豪華官車改搭的士都已經係環保先鋒！老朽想起一則軼事：美國著名記者索爾滋伯里在《長征——前所未聞的故事》一書，寫到延安時期，因為工作繁忙，生活艱苦，毛主席便秘嚴重。這個消息當時延安上下都知道，很多細心的人想方設法為主席找偏方，情況稍有改善，窰洞上下便口耳相傳：主席通便了！

大人物就是不一樣，芝麻小事，可以被看成西瓜大事。高官步下凡間，所過之處，便有春天繁花吐艷的喧嘩。哎唷！邱騰華在地鐵車廂與我擦身而過！嘻嘻！唐唐同我一起擠火車入馬場喎！哈哈！還有孫公在巴士上睇嘅嗰本書，同我一樣咁無聊……老朽原來疲極，在回家的巴士上發春秋大夢！