王會長話細個屋企窮，家住鑽石山大磡村，附近無乜嘢玩，但出名嘅大觀片場同堅城片場都係喺附近。王會長年紀細細但好生性，諗住幫輕吓父母，就同埋一班同學仔齊齊喺片場附近徘徊，博一個入去做兼職茄哩啡嘅機會。王會長話當時做個路人甲角色，一日可以賺五毫子（五粒神），如果個角色有對白，仲可以多五粒神添；一星期通常會有兩、三個演出機會，計落呢份兼職都幾和味！

八和會館同信和集團搞粵劇獎勵計劃，王桂壎（中）同太太Angela（左二）齊齊去捧場，佢身邊就係多年前「合作」過嘅粵劇名伶阮兆輝（右二），右一為謝雪心。 （鍾麗珊攝）

以前鑽石山大磡村附近有好多粵語片片場，可惜大磡村因為要興建沙中線而清拆。 （資料圖片）

最愛扮薛覺先

可能因為咁，王會長到依家都喜愛粵劇，幾忙都要抽時間睇劇過吓戲癮，仲話最鍾意扮薛覺先嘅獨特唱腔添！咁唔知卓妮幾時先有機會睇到王會長唱戲呢？佢就好謙話只係會同太太兩個人喺屋企自己唱吓，唔敢出嚟獻醜喎。其實王會長又使乜咁謙呢？原來佢唔止唱粵劇有番兩道，連打Band佢都掂，上星期喺律師會一個大型晚宴上，佢先至上台夾Band對住成千觀眾邊彈邊唱，不知幾有台風，睇到連卓妮都想落場跳舞。王會長仲話遲啲會為律師會搞番個粵劇興趣小組，到時大家就可以一睹王會長嘅風采嘞！

卓妮