無車日冇料到，街頭街尾依然咁多車，唔單止係功夫茶嘅主觀判斷，仲有客觀數據。根據運輸署統計，尋日七點至十點繁忙時段，比起兩周前嘅星期二（上星期因為打風所以唔計），私家車流量並無顯著減少。以紅隧為例，僅僅輕微下跌百分之三。講到東隧同西隧，搞鬼咯，私家車流量不減反增，兩條隧道同樣多咗五十九架次。

喂，係人都知環保好重要，減少排放廢氣有助拯救地球吖嘛，可以避免水清沙幼、椰林樹影嘅馬爾代夫陸沉亡國，點解無車日嘅反應咁平淡嘅呢？功夫茶諗到三個可能，第一：宣傳嚴重不足，好多人都唔知九二二應該兩條腿走路，或者改搭公共交通工具，再唔係，幫襯人力車都得；第二：私家車並唔係想像之中咁可有可無，好多住到山長水又遠嘅車主靠晒四個轆代步，你唔畀佢揸車等於敲跛佢對腳；第三：政府高官冇乜人氣，號召力低過女星低胸裝，雖然由曾蔭權率領司長局長帶頭示範行路搭巴士，市民完全唔聽佢哋支笛。

講到曾蔭權行路響應無車日，其實得啖笑，禮賓府同政府總部距離有幾遠呢？兩條街咁大把，其實佢老人家平日就應該行路啦。由禮賓府去聖約瑟堂望彌撒又點呢？亦係一段超短路程，三百公尺左右。環保組織幫佢計過數，由煲呔曾上任至今，淨係坐車去望彌撒就排放咗三噸二氧化碳，呢位叔台想唔認係「氣候逃犯」都唔得。

講開無車日，當然唔可以唔順便提一提電動車。身為名義上嘅環保一哥，環境局局長邱騰華早兩日好高調咁樣推介一款電動車，讚佢性能良好零排放，所以政府計劃大手採購，準備分派畀各部門使用咁話。

功夫茶想問邱局長兩個問題。第一，假設支持環保救地球嘅熱血市民買咗電動車代步，可以去邊處充電呢？香港家陣乜鬼配套措施都冇，停車場想搵個插頭，難過出街撞到ＵＦＯ，電動車車主做唔成救世英雄，反而做咗超級傻瓜。

第二，即使搵得到插頭充電，電動車係唔係真真正正嘅環保好朋友呢？功夫茶好有懷疑囉，因為發電廠係舉世公認嘅排污兇手。電動車零排放啫，發電廠勁排放喎，邱局長淨係識得高調推介電動車，唔去要求發電廠改用乾淨嘅再生能源，排放廢氣只不過左手交右手咁解。打個譬喻吖，假如邱騰華有特異功能，有本事唔用正常途徑排放人體廢氣，轉去肚臍盡情釋放，唔通咁就唔算放屁咩？唔通放屁就唔臭哩咩？

所以話啫，無車日又好，電動車都好，根本就係假環保。如果話曾蔭權係氣候逃犯，邱騰華就係逃犯幫兇！