前社會福利署署長「阿魚」余志穩榮休已有一個月，好多人關心佢過去一直忙到「無朋友」，會否適應突然靜下來嘅退休生活呢？早幾日喺中環見到阿魚，佢話退休頭一個月仲未覺得唔慣，事關忙於還家人債和朋友債，好似早幾日啱啱還完一單朋友債，約咗幾個好朋友去香港會食晏傾偈，無計啦，退休前根本忙到無時間交際嘛。
朋友債就話可以慢慢還啫，但對於家人債，阿魚相當着緊，所以上月正式退休後，就即時帶埋老婆同有「理大周慧敏」綽號嘅愛女余文蔚，分別去日本同泰國玩咗大半個月，至於旅行以外嘅日子，阿魚每朝早都會同太太行山晨運，強身健體之餘，又可以靜靜哋當拍拖。
阿魚仲話，現正與多間大專院校商討緊義務教學工作，盡量將個人知識及經驗傳授畀學生，但就絕對唔會學「庸官殺手」王永平咁發聲批評政府喎，最多只係同學生交流吓時事就算嘞。估唔到阿魚未學佛，佢嘅胸襟和器量已經咁廣闊！