「十‧一」活動排到密麻麻，香港歷史博物館尋日開始展出名為「百年中國」嘅文獻及圖片展覽，政界名人爭相捧場，連讀番書嘅經濟動力成員林健鋒（Jeffrey）都有去湊熱鬧。Jeffrey話，以前港英殖民地年代讀書只識國父孫中山，山西淨係識「竹葉青」，但回歸後經過惡補，已加深對國情認識，連國家版圖都識唔少。
Jeffrey話，自從做咗政協後，經常到內地考察，對內地地理位置熟咗好多，好似山西省，原來除咗「竹葉青」外，原來仲有好多煤礦，又知道貴州嘅地理位置，講到好似成個中國通咁。不過，一講到中國有幾多個省，Jeffrey就大出洋相，佢話：「大概有四十二、四十三個省咁上下啦！」聽完真係嚇一跳，中國版圖幾時變得咁大呢？
其實中國只係有廿三個省、四個直轄市、五個自治區及兩個特別行政區，就算數字上加埋都無四十幾咁多，唔通Jeffrey希望祖國省份擴展到四十幾個？