特區政府尋日大鼓大鑼搞咗一場「十‧一」座談會大龍鳳，大會嘅官方語言係普通話，台上一眾嘉賓，好似工聯會會長鄭耀棠同「新界王」劉皇發咁，由於佢哋普通話嘅水平真係好普通，逐一露底。
座談會嘅發言嘉賓，粒粒都係不同領域嘅星級人物，不過，要佢哋對住台下三百幾人表演煲冬瓜，即時變晒排隊入試場嘅小學生，戰戰兢兢，事前做晒工夫。好似「新界王」劉皇發咁，兩、三個星期前一收到通知，即刻搵私人老師惡補普通話，上星期佢帶領屯門區議會去日本考察，都隨身帶埋ＭＰ３，不停聽普通話老師嘅錄音帶，填鴨式苦練。補課兩星期，發叔尋日嘅煲冬瓜依然有啲令人聽唔明白，佢發完言落咗台，仲怨自己講得太快，其實，七十歲人有咁嘅勇氣，算唔錯啦。
發叔同棠哥普通話唔掂，代表香港青年界別發言嘅香港青聯主席陳仲尼相比之下就字正腔圓得多，常務副主席葉振都同副主席霍啟剛亦有嚟撐佢場。陳仲尼話，自己無正式學過普通話，純粹因為成日返內地交流，聽得多，自然講得好，篇講稿佢自己親手寫，親手改，所以尋日五分鐘一氣呵成，唔使睇稿讀。