港大頒授名譽大學院士銜嘅人士之中，赫然發現其中一位並非社會知名人士、可能大家都不認識嘅人，但對於一班港大人來說，佢嘅地位卻舉足輕重，呢個人就係喺大學堂工作超過四十年、宿生稱為「三嫂」嘅袁蘇妹。三嫂曾擔任過宿舍四級廚師、助理廚師及宿舍服務員等職務，但三嫂作出嘅貢獻卻遠超過這些職位，佢對宿生們嘅照顧無微不至，可算是宿舍嘅靈魂人物，好多名人都受過佢嘅照顧。
三嫂與港大結下半生緣，一九五七年偕丈夫承包大學堂伙食服務，四十年來每天負責照顧宿生嘅起居飲食，甚至成為佢哋嘅家庭、學業同就業顧問，仲做埋愛情顧問添！港大尋日介紹三嫂時，話佢經常勸喻拍緊拖嘅宿舍男生珍惜眼前人，叫啲男仔對女朋友好啲，每當宿生娶新抱時，都例必請三嫂飲喜酒，甚至斟新抱茶畀三嫂飲。
曾受三嫂照料之恩嘅名人包括馬會主席陳祖澤及「金刀梁」梁智鴻及無綫電視副行政主席梁乃鵬等，尋日佢哋好多都到場恭賀，當三嫂授銜嗰一刻，一眾年過半百嘅港大舊生齊齊揮手吶喊，場面好感人！
卓妮