煲呔曾好似好無奈咁話：「今朝前往教堂時，有二十幾個前線記者追住我；由禮賓府行過嚟（政府總部）時，又差唔多五十個傳媒追住我，我哋嘅保安同警衞也需要增加人手……又唔知前線記者會唔會歡迎，所以我要諗清楚。」淨係佢呢番話，就睇得出佢講就天下無敵，做就冇心冇力，綠色和平項目主任古偉牧即時反諷佢過分放大自己嘅新聞價值：「如果養成習慣就唔係新聞啦！」

孫公嘟八達通呢一幕，為滿足記者做咗好幾次。（徐家浩攝）	煲呔曾（中）由禮賓府行去政府總部，大班人傍住行，勞民傷財！	邱騰華身為環境局局長，坐港鐵交足戲響應無車日。（麥潤田攝）

官邸喺半山白加道嘅政務司司長唐英年尋日約埋律政司司長搭的士去中環政府總部開行會，不過開完行會後，唐唐離開時竟然大模廝樣登上座駕，擺明連做騷都交行貨，一見唔到鏡頭就回復真我。

局長議員齊交戲

相對於上述兩位仁兄(火羅)爆表現，其他局長都算交足戲，好似環境局局長邱騰華由屋企行十五分鐘搭港鐵返工，佢話平時過海撞正繁忙時段都會搭公車，而且以往喺貿易署工作時，大部分時間都以港鐵代步。教育局局長孫明揚亦身體力行坐巴士返工，不過上車時傳媒爭住影佢嘟八達通，仲係長者八達通嗰隻，所以要求佢一嘟再嘟，搞到孫公忍唔住話：「好似嘟咗好幾次喇喎！」保安局局長李少光上午請咗半日假，下午由觀塘坐港鐵返中環政府總部西翼，跟大隊響應。

一眾行會成員尋日都好「醒水」，搭公車響應無車日，家住海怡半島嘅棠哥鄭耀棠就坐巴士去中環，佢仲同記者呻畀多咗車費，因為年過六十嘅棠哥本來享有長者優惠，但佢用咗一般八達通，所以享用唔到優惠；另外，家住屯門嘅劉皇發雖然坐私家車去中環，不過架車冇開上政府總部，發叔笑言：「我行上嚟都算參與無車日吖。」另外，一直鼓吹綠色新政嘅立法會議員余若薇平時多數由老公揸車送返工，佢尋日為咗響應無車日，揼低老公自己搭港鐵，不過佢話老公咁啱有特別事要處理，所以參與唔到今次活動，即係揸番車咁囉。所以話，搞咗一大輪，始終都係做騷多啲。