六大宗教界首領尋晚齊集尖沙咀龍堡國際賓館舉行「十‧一」酒會，盛傳健康一直麻麻嘅寶蓮寺住持釋智慧撐住拐杖都要出席，曾暗示年底交棒嘅佢尋日忽然改口風，話今年內唔會換人，不過地位崇高嘅首座和尚名額，就由現時二人（健釗法師及宏通法師）加到三人，意味未來方丈人選之爭唔係二揀一，而係三揀一，戰況更加激烈也！
釋智慧月前喺公開場合以一句「未來方丈」介紹宏通法師畀迪士尼行政總裁金民豪認識後，旋即惹起欽點接班人風波，尋日釋智慧收晒口，唔敢再提「接班人」三個字，但話口未完，佢爆出寶蓮寺將有新高層成員加盟。
釋智慧話，自己上咗年紀，講嘢冇以前咁好，年底將會邀請一位內地高僧來港擔任首座和尚，幫手講經。查實釋智慧身邊一直有健釗及宏通做左右手，分別主管行政及佛學研究，如今突然破例增多一名首座和尚，用意耐人尋味。釋智慧話，呢三位都係未來方丈人選，但最終邊個接班，就要由董事局決定。新首座和尚到底由邊個接班人？大家拭目以待嘞。