外號「黑英」嘅前天文台台長林超英，兩文三語頂呱呱就人人都知，但原來喺香港土生土長嘅佢，講番鄉下方言潮州話一樣叻到可以開班授徒。適逢浸大持續教育學院打算開潮語課程，黑英前日特登幫手去分享吓學潮語嘅好玩經驗，仲透露咗佢嘅尋根故事。
話說好耐之前黑英陪爸爸去法國巴黎，本身都識法文嘅黑英帶住爸爸周圍玩，唔識路就用法文問當地人。點知林爸爸唔信佢法文了得，見親中國人就用潮州話問：我哋咁行係咪真係啱㗎？黑英當時仲諗，法國華僑邊識聽潮州話㗎，點知十個有九個都識聽，仲識講添！黑英覺得好奇，點解遠至法國都咁多潮州人。所以佢有次專登返鄉下潮州睇吓，發覺原來潮州相對較窮，啲人喺鄉下搵唔到食，於是四散去到其他國家，令佢對鄉下嘅認識增加咗，更加熱愛潮州文化。
黑英話學潮州話都有好多着數，就係對學其他外語好有幫助，例如潮州話無Ｆ嘅發音，同日文、韓文以至西班牙文都好相近，學起上嚟較易掌握，怪唔得黑英對自己啲鄉下話咁自豪啦！