呢嗱，就咁，今年係中共建政六十周年，特區政府作為孝順仔，自不然要幫一幫拖，賀一賀壽，所以屯門鐵定九月十九日星期六晚整個「九一九、搞一搞」大派對，即係舉行「國慶銀花耀屯門」煙火匯演。煙花喺八點開始發放，歷時大約二十分鐘，而七點半到十點期間，黃金泳灘以及新咖啡灣泳灘會舉行大型沙灘音樂會。本來呢，你擘大喉嚨高歌一曲「齊歡唱呀呀，同慶賀呀呀」，冇人會話你唔啱，甚至有可能讚你與民同樂。問題係，放煙花啫，開派對啫，使唔使封晒成條青山公路呀？

運輸署助理署長羅鳳屏話喎，當日下午六點至八點，青山公路會實施部分封路措施，晚上八點煙花匯演開始之後，青山公路就會全線封閉。封到幾點呢？對唔住，冇講，應該係等到人潮散晒先至解封啩。

如果大家唔係咁熟悉黃金海岸一帶環境，等功夫茶簡略介紹一下。其實想唔簡略都唔得，因為一句講晒，青山公路係當地居民出入必經之路。去街咩？青山公路囉。返歸咩？青山公路囉。想行第二條路咩？冇㗎喇，來來去去都係青山公路。

好嘞，你話放煙花，冇問題；你話開派對，冇問題；你話六點打後部分封路，勉勉強強都冇問題；因乜解究過咗八點就全線封路呀？使唔使趕到咁絕呀？畀條生路行吓都得啩！

如果你係當地居民，你可能會諗，既然出又冇得出，入又冇得入，等於變相軟禁，不如咁咯，全日足不出戶，等到夠鐘就去黃金泳灘睇煙花。冇錯，呢個係比較聰明嘅諗法，不過太遲嘞，因為黃金泳灘、新咖啡灣以及海濱花園一帶係要憑券入場嘅，而入場券早於兩星期前已經派清光。

唔知大家點睇，功夫茶就覺得呢鋪非常擾民。喂，本來係與民同樂，點解要變咗與民為敵？唔係個個都想睇或者得閒睇煙花㗎，好多人星期六仲要辛辛苦苦返工，放咗工已剩番半條人命，你居然唔畀佢返屋企，害到佢好似游魂野鬼咁樣流離浪蕩幾粒鐘，殘唔殘忍啲呀！

真係唔知運輸署搞邊科，一定要全線封路嘅咩？半封唔得嘅咩？假如有人十萬火急一定要撲返屋企，你要佢沿陸路行過去好吖，定係沿海路游過去？

所以話啫，呢個政府永遠有辦法好心做壞事，賀國慶賀出大頭佛。九一九，搞一搞，普天同慶居然搞到普天同興，有冇搞——錯！