自從自由黨同經濟動力分咗家，兩家人不時都傳出爭黨友嘅傳聞，尋日經濟動力為「同心結力抗毒大行動」搞咗個記招，點知又惹出兩家人爭「女」疑雲。
話說尋日嘅活動，連早前傳被拉攏入自由黨嘅沙田區議員龐愛蘭（Scarlett）都有出席，咁係咪意味今次係經濟動力爭贏Scarlett先？但係Scarlett就耍手擰頭話唔關事，今次幫手只係佢一直都做開禁毒嘅工作，覺得今次活動非常有意義，無乜政治目的喎！Scarlett仲大讚經濟動力做嘢好認真，睇嚟合作得唔錯，反觀佢話未同自由黨合作過，所以唔知夾唔夾喎。
邀Scarlett出席活動，經濟動力係咪有心撬牆腳先？3L之一嘅林健鋒（Jeffrey）聽到立即臉面一沉，話佢哋七月已經開始籌劃搞抗毒，即係比Scarlett同自由黨「傳出緋聞」仲要早成個月，間接否認撬牆腳。不過Jeffrey就漏咗少少口風，話希望每年都繼續做呢個抗毒活動，即係長遠嚟講，年年都至少有一次機會同Scarlett合作啦！